PUISI BELEPOTAN

Setan.. katenye lengket kaya ketan,
kalo udeh nempel terus deh tuh berentetan,
dimane-mane selalu aje nyari kesempetan,
ngga dikampung ngga dikote sama aje mirip ame nyang di utan,

Setan.. mukenye serem semrawutan,
sebab matinye gantung diri dikolong jembatan,
mayatnye kaga dikubur malahan dibuang ke Cililitan,
katenye biar diye deket ame pohon rambutan,

Setan.. semasa idupnye demen maen sumpritan,
ade lagi nyang bilang kalo diye demen maen terompetan,
sekali tiup langsung jigongnye pade muncratan,
baunye ngga kire-kire sampe ke jalan merdeka selatan,

Setan.. semasa idupnye sering menyalahgunakan jabatan,
sebab tukang koropsi dijadiin panutan,
akibatnye semue pade ikut-ikutan, pade mateduitan,
diye pade kaga mikir kalo rakyatnye pade blingsatan,

Nyari duit seperak aje sampe pantat keringetan,
hemm.. rupe-rupenye mirip ame cerite dunie persilatan,
siape nyang jago diye nyang bakal dapet penghormatan,
gile bener.. semuenye pade kaga punye rase kerakyatan,

Semoge Allah selalu ngasi rakyat keselamatan,
biar kate kaga digubris segale tuntutan,
biar kate semue rakyat pade blangsak kaya orang utan,
jangan sampe deh tergode ame nyang namenye setan
nyang selalu bikin iman kite belepotan.